By fonoti

O Lau Aganu’u O Lou Tofi Mai Le Atua:

O LE AlGA O TUPU, AIGA O PAPA, AIGA NA TAFA’IFA, AIGA TAULAGI O SAMOA

O le usuga a Tuia’ana Tama’alelagi ia Vaetoeifaga le alo o Tui-toga Faisautele ona maua lea o le teine o Salamasina, le ulua’i Tupu Tafa’ifa o Samoa lea na e’e iai Papa e fa ole Tuiatua, Tuia’ana, Vaetamasoalii, ma le Gatoaitele, o le finagalo a So’oaemalelagi Levalasi ile susuga pa’u mai ole fofoga a Nafanua i le Falefa o le Tapuaiga e fa’aee Papa e fa ia So’oaemalelagi Levalasi. Ona usu mai lea o Tapumanaia le alo o le Tonumaipe’a Saumaipe’a ia Salamasina, ona maua lea o le teine o Fofoaivao’ese ma le tama o Tapumanaia(ii), lea na ave i Falealili e Elipo ma Tauanu’u e fai ma o la ali’i, ona fa’ae’e lea iai o lo la Ao o le Satele. O Satele Tapumanaia(ii), na soso’o ia Fofoaivao’ese ma lona tina o Salamasina i le Tupu. Ona usu ane lea o le ali’i o Tauatamainiula’aita ia Fofoaivao’ese ona fa’ae’e lea o le gafa:- O teine e to’alua o Taufau, ma Sina, ma lo la tuagane o Asomua Lemalama.

Ona soso’o foi lea o Taufau ma lona tina o Fofoaivao’ese i le Tupu. Ona usu lea iai o Tauili’ili Papa ia Taufau fa’ae’e le gafa:- O le ali’i o Tupuivao. O le tala i le ali’i lenei o Tupuivao e fiafia tele i le faiva o le seu lupe. Ua o’o ina vaivai le gasegase o lona tina le Tupu o Taufau, ona alu lea o le savali ia Tupuivao e sau ua vaivai le gasegase o lona tina le Tupu, ae le sau lava, ma lana upu e fa’apea “E le mafia ona ou alu atu se’i o’u talia lupe o maunu”. Ona to’atama’i ai lea o lona tina, o Taufau. Ua fai atu ia Tumua ma Aiga, “Ua agaleaga la’u tama ia te a’u, ae ia outou fa’alogo mai i la’u upu. 0 le a tafea la’u utu, ae o le a au le utu a lo’u uso o Sina.”

O le mafua’aga lena o le alagaupu Ua tafea le Utu a Taufau.” O le uso lea o Taufau, le teine o Sina na usu iai Tito’iaivao o Faleatiu, ona fa’ae’e lea o le gafa:- O le ali’i o Faumuina, ma o le ali’i lenei e ana le TUPUFIA, O ia fo’i lea na soso’o ma Taufau i le Tupu, e pei ona mavaeina e Taufau ina ua le usita’ia e Tupuivao le fanoga o lona tina o Taufau. Ona usu lea o Tuia’ana Tuiatua Faumuina le Tupufia ia Manalelei le alo o Vaovasa fa’ae’e le gafa:- O le ali’i o Fonoti, toe usu Faumuina ia Tu’uamaleulua’iali’i le alo o Manu’aifua o Afega fa’ae’e le gafa:- O le teine o Samala’ulu, toe usu Faumuina ia Atamulau le alo o Segi i Amoa fa’ae’e le gafa:- O le alii o Va’afusu’aga Tole’afoa.

0 le tina o Fonoti le tamaita’i o Manalelei na Malaga i Tanumaleu i LOTOFAGA i lona aiga ia Tupuola e totoma ai, i se Ie-toga e alu ai le Malaga a Tuia’ana Faumuina i Tutuila e a’ami lona uso o Tupuivao o aunu’ua ai. Ona alu lea o Manalelei ma ave le Mutia ma le Ma’a, o Papa o le Tuia’ana ua leai seisi lava mea o totoe i le Tuia’ana. A’o fai le alofisa o Tupuola, Seigafolava ma le tamaita’i o Manalelei, ona fa’amatala atu lea e Manalelei lona aveina atu o Papa o totoe i le Tuia’ana, ae o lo’o fa’afofoga iai Tupuola, ona fa’apea atu lea o Tupuola ia Manalelei, ua malie tele lau tala ma siou leo malu. O lou suafa lena e manatua ai le Alofisa i Tanumaleu neiTalaleomalie” O le mafua’aga lea o le suia o le igoa o le Tamaita’i ia Talaleomalie.

O le fai’a a Tupuola ma Manalelei, Na usu Tuiavi’i ia Letele-o-Talaia le alo o Mata’afa i Ululoloa Faleata fa’ae’e le gafa:- O Taua’aletoa, ma le teine o Unusialetoa. Usuia Unusialetoa e Malietoa Sa o Mulifanua fa’ae’e le gafa:- O Togia, Ifopo, ma le teine o Aloalonei. Usuia Aloalonei e Vaovasa o Gataivai Savai’i fa’ae’e le gafa:- O Manalelei. Taua’aletoa na usu ia Falenaoti Lelasiu’uila (Fufeai) le alo o Tauili’ili o Amaile Aleipata fa’ae’e le gafa:- O Tupuola, Tago, ma Pafuti le teine.

MAFUA’AGA O LE SUAFA: FONOTI
Ua sauni le tamaitai o Talaleomalie Manalelei mo Leulumoega, ona fai loa fo’i lea o lo la ava taumavae ma Tupuola, ua uma lo la ava ua fono nei i le ti. Sa masani Samoa anamua ona fai umu ti, e eli le lua ona lau mai lea o le ti-vao ua lafo iai pei lava ose fa’avevela lona fa’atinoina. O le tasi fo’i lea aganu’u a Samoa anamua o lo’o o’o mai lava i nei ona po, a alu le usu e ave ai fo’i ma le fono o le ava pe’a uma. Ona fai lea o a la upu taumavae a Tupuola, ma Talaleomalie Manalelei. Ua fa’apea atu Tupuola i le tama’ita’i, Sauia o le a e fo’i i lou Ali’i ma I’e ia e lua. O le tasi I’e e Malaga ai Tuia’ana Faumuina e a’ami lona uso taufeagai. AE A ALO OE LE TAMA’ITA’I ONA FA’AIGOA LEA O LOU ALO IA FONO-TI, E FA’AMANATU AI LO TA AVA NA FONO NEI I LE TI. O le tasi o I’e, o le I’e o le nofo a lou alo i le Tuia’ana. Ua taunu’u Talaleomalie Manalelei i Leulumoega i lona ali’i, ua fola atu I’e o lana toma’aga ma fa’amatala a la upu taumavae ma Tupuola. Ua soisoi nei Tuia’ana Tuiatua Faumuina ma Le Tupufia ma lona leo maofa e fa’apea, A! o Pepeve’a I’e na. Ua Malaga Tuia’ana Faumuina Le Tupufia i Tutuila ma le tasi, ae ua tu’u le isi I’e e pei ona mavae ai ma Tupuola.

Sa nonofo le fanau lenei a Tuia’ana Faumuina, ae peita’i! Na iloa e Fonoti ua foua e Va’afusu’aga Tole’afoa le nofoa’iga a lo latou tama. Ona tupu ai loa lea o le taua, o le taua lenei o le TAUA O LE TUPUFIA. Ua mae’a le taua ua fa’atoilaloina Va’afusu’aga Tole’afoa e Fonoti, ona avea loa lea o Fonoti ma Tupu o Samoa. Sa nofo pea Va’afusu’aga Tole’afoa ma mafaufau, e tatau lava ona laga lona to’ilalo. Sa ia taupulepule loa o le a si’i le taua ia Fonoti. Na o’o ilea aso na atofaina e si’i ai le taua, ae peita’i! E le’i fa’ataunu’uina. Toe o’o fo’i i le taimi ua tatau ai ona si’i le taua, ae te’i fo’i ua toe tu’u. E iai ona mafua o ia o le TAULAGI O AIGA, PO’O AIGA TAULAGI. E mafua mai le Taulagi i le taua e na ole taulagi ae le o’o. E mafua ai fo’i ma le Ie-toga a le Aiga Taulagi o le SI-I-MA-TU’U. Ona mavaeina lea e Tuia’ana Faumuina Le Tupufia le I’etoga o le Pepeve’a ia Fonoti, ae le malie ai Va’afusua’ga Tole’afoa i le mavaega a le latou tama o Faumuina, faimai e tatau ona ave le I’etoga i lo la tuafafine o Samala’ulu, peitai! E le mafia Fonoti.

O le mafua’aga fo’i lea o le taua sa faia a Fonoti ma Va’afusua’ga Tole’afoa ma lo la tuafafine o Samala’ulu. E tau’a o le taua o le Paegauo po o le taua o Papa ole Tupufia mo Papa e fa! Ua “au fa’atasi Va’afusua’ga ma Samala’ulu ae to’atasi Fonoti. Ua tau le taua ona sulufa’i lea o Samala’ulu i le maota o le ali’i o Tofaeono, ae tuliloa atu e Fonoti. E ulufale atu Fonoti i le maota o Tofaeono o apo’apo mai le tao a Tofaeono, e fa’atalitali mai nisi e tuliloa atu ia Samala’ulu. E va’ai mai Tofaeono o Fonoti, ona fa’apea lea o Tofaeono. Fa’apea lava ita po’o ai, ae o oulua lava e tasi lo lua tama. O lea Fonoti o le a e “aufata i tao, ae aufata i toga oe Samala’ulu” UA TUPU TAFA’IFA O SAMOA NEI FONOTI, ae ua fa’atafea nei Va’afusu’aga Tole’afoa i Tutuila i le motu o Salai’a .

ONA USU lea O FONOTI LE TUPU ia FUATINO le alo o To’alepai o Satapuala fa’ae’e le gafa o le ali’i o MUAGUTUTI’A, toe usu FONOTI LE TUPU ia TA’ELE’ASA’ASA le alo o Tautaiolefue o Lealatele i Savai’i fa’ae’e le gafa o le teine O FALEGAOTI. O nei lava gafa e tau uma i le Tuia’ana, O iai le muagagana e fa’apea: “O Le Gafa O Tuia’ana Ua So’o.”

AlGA TAULAGI: UPOLU, Fasito’otai, ma Falese’ela.
AlGA TAULAGI: SAVAI’I, Faga, ma Sa’asa’ai.
AlGA SATUALA: UPOLU, Fasito’outa, Nafoali’i, Satapuala,Lefaga, Faleasi’u, ma Falese’ela.
AlGA SATUALA: SAVAI’I, Amoa i Sisifo (Lano ma Pu’apu’a), Lealatele (Samala’ulu ma Mauga, e aofia ai ma Leauva’a i Upolu).

GAFA OLE AIGA O TUPU, AIGA O PAPA, AIGA NA TAFA’IFA, AIGA TAULAGI O SAMOA

TUI-FITI LE TUPU ANAMUA O FITI:
1. Usu Tui-Fiti ia Si’uuilasisifo le alo o Tui-Atua Puluitua faae’e le gafa o Fata po’o Fata-igoatele (tama). [: Suafa “Fata” o Lotofaga le Aiga Salevalasi]
2. Usu #2 Fata po’o Fataigoatele ia Sinasinavaiao le alo o Tuiatua Fogalepulu o Etemuli faae’e le gafa, o Fata (ii), po’o Fata-levave (tama).
3. Usu Fata (ii), po’o Fatalevave ile tama’ita’i o Fulu’ula-ale-matoto o le ilamutu o Tui-Fiti i Lotofaga, fa’aee le gafa: o Leu (teine).
4. Usuia Leu e Matasepu o Lepa, fa’aee le gafa: o Tau’iliili (tama), ma Talalaufala (teine).
[: Ona tofia lea o Tauili’ili e lona tama, e alu i Amaile e tapega le a’ai e taunu’u iai le Ali’i o Aiga].
TUI-ATUA LE TUPU O ATUA:
5. Usu mai le Tuiatua Fa’asoutele o Ti’avea ia Talalaufala, fa’aee le gafa: o Fililesalue (teine).
6. Usuia Fililesalue e Leali’ifanovalevale i Palauli, fa’aee le gafa: o Popoai (teine), Taufaito’a (teine).
TUI-TOGA LE TUPU O TONGA:
7. Usuia Popoai e le #1 Tui-Toga (viii), fa’aee le gafa o Togialelei (maliu, e le’i usu gafa), ma Tuiavi’i (tama: tau i fa’avae a gafa o Tuifa’asisina, Tauaaletoa ma Unisialetoa).
8. Usuia Taufaito’a e le Tui-Toga (viii), fa’aee le gafa o Tui-Toga Puipuifatu (tama).
9. Usu Tui-Toga Puipuifatu ia Pulu-mata-moana le alo o Hulu-a-talala o Toga, fa’aee le gafa o Tui-Toga Manaia (tama: na usu ia Nafanua), ma Tui-Toga Faisautele (tama).
TUI-MANU’A LE TUPU ANAMUA O MANU’A:
10. Usu Tui-Toga Faisautele ia Painu’ulasi le alo o Tui-Manu’a Ali’atama le Tupu o Manu’a, fa’aee le gafa: o Vaetoefaga (teine), ma Ulualofaiga (tama).
[: Ole tama’ita’i lenei o Painu’ulasi, po’o Si’ueatausilinu’u na fe’avea’i e Aumua ma Olotua o Fagaloa e sa’ili ai so la’ua Ali’i. Ua so’o Ali’i o Samoa e le alo le tamaita’i. O lea na malaga ai Aumua ma Olotua ma Si’uea o tausilinu’u i Toga, maua ai le tasi igoa o Si’ueaotausilinu’u, po’o Painu’uilasi fo’i].
TUI-A’ANA TAMALELAGI: FA’AVAE O AIGA E LUA, AIGA SATUALA MALE AIGA SALEVALASI:
11. Usuia Vaetoefaga le alo o Tui-Toga Faisautele e Tuia’ana Tamalelagi le atali’i o Tuia’ana Tagaloa Selaginato ma Vaetamasoali’i, fa’aee le gafa o Salamasina (teine).
[: Ole Ulua’i Tupu Tafa’ifa o Samoa, na faae’e iai Papa e fa ole Tuia’ana, Tuiatua, Vaetamasoalii ma le Gatoaitele mai ia Nafanua, ma le tamafai a So’oaemalelagi Levalasi le fa’avae ole Aiga Salevalasi, e uso o la tina ma Tuia’ana Tamalelagi na usu muamua ia Namoaitele maua le tamaulumatua o Tuala, Ole Alii o Aiga ma le fa’avae ole Aiga Sa-Tuala. O Aiga nei e lua o Samoa. Na mavae ai le ulua’i Tupu Tafa’ifa o Salamasina ia Aiga ma Tumua i lona fa’atafa i Lotofaga: O Aiga e lua, ua Pa’ia ole Aiga Sa-Levalasi ma le Aiga Sa-Tuala e tausi i Papa ma Aiga, ma latou toga ua pa’ia ole Pulu ma le Leuleu].
SALAMASINA LE ULUA’I TUPU TAFA’IFA O SAMOA: AIGA PA’IA O SALEVALASI ATUA:
12. Usuia Salamasina le ulua’i Tupu Tafa’ifa o Samoa e Tonumaipe’a Tapumanaia le alo o Tonumaipe’a Saumaipe’a o Auala i Savai’i, fa’aee le gafa: o Fofoaivaoese [teine: Na fa’asolo iai Pa’ia ma Papa ole Tupu], ma Tapumanaia (ii) [tama: Na e’e iai le Ao o le Satele i Falealili: Tapuolesatele].
13. Usuia Tuia’ana Tuiatua Fofoaivaoese e Tauatamaniula’aita le alo o Valasi-I-Ologa le Aiga Tonumaipe’a i Satupa’itea Savai’i, fa’aee le gafa: o Taufau (teine: Na tafea lana Utu), Sina (teine: Na au lana Utu), ma Asomua Lemalama (tama).
14. Usuia Tuia’ana Tuiatua Sina e Tito’iaivao o Faleatiu i A’ana, fa’aee le gafa: o Faumuina Le Tupufia (tama ulumatua ‘Ole Alii o aiga’) [: E fa’alupe Ole “Tupufia” au’a e fia Tupu uma lana fanau].
15. Usu #1 Tuia’ana Tuiatua Faumuina le Tupufia ia Manalelei po’o Talaleomalie le alo o Vaovasa i Gataivai Savai’i, fa’aee le gafa: o Fonoti (tama ulumatua ‘Ole Ali’i o Aiga’).
[: Ole Tupu Tafa’ifa o Samoa, ole Tuia’ana, Tuiatua, Vaetamasoalii, ma le Gatoaitele. Ole taua mo Papa e fa, e ta’ua ole “taua ole Paegauo ale Tupufia” o Fonoti ma ona uso taufeagai o Va’afusuaga Tole’afoa ma le teine o Samala’ulu po’o ai a Tupu o Samoa. Na manumalo Fonoti ona o le tulaga fulisia o Samoa sa lagolago ia te ia. Ole tofiga ole Malo ole tupu o Fonoti: (1) Fa’alupega Aoao O Samoa: Tumua ma Pule, Itu’au ma Alataua, Aiga ile Tai ma le Va’a o Fonoti. (2) Te’o: O oe o le Anava o Taua, Ma lou Manu Samoa. (3) Fia’aitagata: O au Suafa ia o Fatialofa, ma Auelua. O le a fai i la’ua ma Tulauniu o Atua, Punefu o Atua, To’oto’o o le Tuiatua. (4) Mata’utia: O le Va’a o Fonoti, O le Malu o Ma’auga o Leulumoega, ma Lalogafu’afu’a, Lufilufi. Fea, o le Va’a o Fonoti, O fea fo’i e Fa’aopea ia Atua le Fauono. (5) Molio’o: O oe o le Va’a o Fonoti, O oe o le To’o o le Fua. (6) Leutele; (Falefa), O oe o le A’ai o le Tupu o Fonoti. Falefa (District); Sanone, Gagaemalae, Saleapaga, Sagapolu, Falevao, Sauago, Saletele, Uafato. (7) Tofaeono: E Ono Pou o Lufilufi, Fitu ia te oe. E Iva Pou o Leulumoega, Sefulu ia te oe. E Fitu Pou o le Malietoa, Valu ia te oe. E Tolu Pou o Satunumafono, Fa ia te oe. (8) OLe Va’a o Fonoti: Samamea, Ma’asina, Lona, Taelefaga, Salimu ma Ma’auga, Musumusu, Falefa, Sanone, Gagaemalae, Saleapaga, Sagapolu, Falevao, Sauago, Saletele, Uafato, Lalomauga, Manunu, Faleapuna, Lufilufi, Saluafata, Fusi, Salelesi Safanua, Fagaloa, Solosolo, Luatuanu’u. (9) Tumua o Asiata: Ole a Falefa Tumua ia te oe-Sa’iliga Malo o Asiata ia Fonoti. (10) Ole Mavaega a Fonoti le Tupu Tafa’ifa ma lona uso; “O Papa e fa, ole a ia te a’u ma la’u fanau, A’o le Ao ole Tonumaipe’a ia oe Tole’afoa ma lau Fanau”].
16. Toe usu #2 Tuia’ana Tuiatua Faumuina le Tupufia ia Tu’umaleulua’iali’i le afafine o Manu’aifua i Afega, fa’aee le gafa: o Samala’ulu (teine)
[: Na ia tofiga Alipia, Ole matua na togi. A’o tofiga ia Tanuvasa, Ole itu lua iai o A’ana].
17. Toe usu #3 Tuia’ana Tuiatua Faumuina le Tupufia ia Atamulau le afafine o Segi i Amoa, Fa’asaleleaga i Savai’i, fa’aee le gafa: o Va’afusuaga Tole’afoa (tama)
[: Ole Ao le Tonumaipe’a, mai tofiga a le Tupu o Fonoti. Ma le fa’avae ole Aiga Taulagi].
FONOTI LE TUPU TAFA’IFA O SAMOA: AIGA PA’IA O SALEVALASI I LOTOFAGA ATUA:
18. Usu #1 Fonoti le Tupu Tafa’ifa ia Fuatino le alo o To’alepaiali’i i Satapuala Aiga Satuala, fa’aee le gafa: o Muagututi’a (tama ulumatua ‘O le Alii o aiga’).
[: Tofiga o Muagututi’a, Na ioe Tumua ile malelega a le Tupu o Fonoti e fa’apea; Muagututi’a, O le a e alu ma lou Muagututi’a, lou Fuatino, lou Faumuina ma lou Melegalenu’u. E te nofo i Mulifusi. E te tua ia Sa-Tuala, Ae tausi oe e Leulumoega].
19. Toe usu #2 Fonoti le Tupu Tafa’ifa ia Taeleasa’asa le afafine o Tautaiolefoe o Lealatele i Savai’i Aiga Satuala, fa’aee le gafa: o Falegaoti (teine: E ta’ua Ole “Ma’opu o Tuala ma Sala”).
20. Usu #1 Muagututi’a ia Poto le alo Amituana’i Manaia o Si’ufaitoto’a i Faleata, fa’aee le gafa: o Seutatia (teine ulumatua ‘Feagaiga ale Aiga’).
[: Ole Mavaega a Muagututi’a, Ole teine ulumatua “feagaiga a le aiga” o Seutatia na tofia e ala’ala ile Maota o Mulinu’u Lalogafu’afu’a ma Sepolata’emo i Luiflufi o Tumua Atua. O lo’o iai le suafa ma le Maota o Seutatia i Mulinu’u Lufilufi e o’o mai ile aso].
21. Toe usu #2 Muagututi’a ia Agaitafili le afafine o Lilo Seve o Salega i Savai’i, fa’aee le gafa: o Mata’utia (tama), Fualau (tama), ma Talopatina (teine).
22. Toe usu #3 Muagututi’a ia Taumata le afafine o Toa’ali’i i Saluafata, fa’aee le gafa: o Fepulea’i (tama), ma Lagi (teine: E tau le gafa ia Mata’afa Fa’asuamaleaui i Amaile).
23. Toe usu #4 Muagututi’a ia Fenunuivao le afafine o Iuli i Falefa, fa’aee le gafa: e le fanau, Tupua Fuiava’iliili (tama fai).
[: Ole atali’i o Fuimaono ma Oilau i Falealili. Sa tali iai Satuala, “Ia Ifo Tonu Le Fuiniu I Le Lapalapa”. Na Saesae Laufa’i ai Tumua, ma e’e iai le ulua’i suafa “Tupua” ma le ulua’i “Tama-a-aiga” ia Fuiavailili, au’a e tele aiga ole tama: fa’avae Aiga Sa-Tupua].
FONOTI LE TUPU TAFA’IFA MULINU’U I LUFILUFI MA LE AIGA PA’IA O SALEVALASI ATUA:
24. Usuia Seutatia o Mulinu’u i Lufilufi e Lilomaiava Nailevai’iliili o Palauli i Savai’i, fa’aee le gafa: o Nofoa-tolu Lilomaiava Vae-ole-nofoa-fia (tama: Suafa Nofoatolu).
[: Ole ulua’i suafa “Nofoatolu” o Lufilufi lea na fa’aee ile Maota o Mulinu’u Lalogafu’afu’a ma Sepolata’emo i Lufilufi o Tumua Atua. E fa’amanatu ai le usuga lea a Seutatia ma Lilomaiva Nailevaiiliili Vaeolenofofia – Satuimalufilufi. Ole uiga o le Nofoa-tolu po’o le Vae-ole-nofoa-fia e fa’amanatu ai ia suafa ole Lilomaiava i afioaga nei e tolu fa’apea (1.) Ole suafa Lilomaiava i Palauli i Vai’iliili, (2.) Ole suafa Lilomaiava i Sagafili po’o Satuimalufilufi, (3.) Ole suafa Lilomaiava i Finao i Safotu i Savai’i].
25. Usu Nofoatolu Lilomaiava Vaeolenofoafia ia Sinaivaiana le alo o Va’afusuaga o Faga i Savai’i, fa’aee le gafa: o Fonoti Nofoatolu Laufeti’iti’i (tama: Fonoti o Lotofaga Atua).
[: Fonoti o Lotofaga Atua. O le toe nofoia mai o le suafa o Fonoti le Tupu Tafa’ifa o Samoa ile Maota o Mulinu’u Lalogafu’afu’a ma Sepolata’emo i Lufilufi o Tumua Atua. Ole Aiga Sa-Fonoti ma le Aiga Pa’ia o Sa-Levalasi i Lotofaga Atua, po’o le Malae fo’i o Papa i Mulifusi ma Tanumaleu i Lotofaga Atua].
FONOTI O LOTOFAGA: VA’ASA MA LE AIGA PA’IA O SA-LEVALASI I LOTOFAGA ATUA:
26. Usu Fonoti Nofoatolu Laufeti’iti’i o Mulinu’u i Lufilufi ia Va’asa le alo o Fiame Muagututi’a le Sa’ofaapito ma le Aiga Pa’ia o Salevalasi i Lotofaga Atua, fa’aee le gafa: o Fonoti Oliovaigafa (tama ulumatua ‘O le Alii o aiga’), Nofoatolu Ti’auliva’a (i), ma Lagouta (teine) – [Sa-Fonoti i Lotofaga Atua].
[: O Va’asa o le alo o Fiame Muagututiá, ole tasi ole to’afa o lo’o fa’alupe nei i Lotofaga Atua o “Alo-tau-tino ole Sa’ofa’apito ua Fiame”. Ole to’afa lenei e filifili po’o ai so latou suli e nofoia le suafa Fiame, pe’a avanoa. Na usu Fiame Muagututi’a ia Masu le alo o Sitagata Timalesa o Lotofaga fotuai mai o Leaegalesolo (tama), Fuiava’iliili (tama), Va’asa (teine), ma Va’aloa (teine)].
27. [: O Fonoti Oliovaigafa na ai ali’i mai iai Molio’o ma le Ailaoa e fai ma o latou Ali’i e iai le ulua’i Suafa Fonoti sa ala’ala i lona Maota o ‘Vainiu’ i Faleapuna. Na maliu ai lava le Ali’i ma sa lagomau ai lava. E pa, e leai sona suli].
28. Usu Nofoatolu Ti’auliva’a (i) ia Tamasailau le afafine o Lualemana o Asu i Tutuila, fa’aee le gafa: o Nofoatolu Ti’auliva’a (ii).
29. Usu #1 Nofoatolu Ti’auliva’a (ii) ia Sologaliua le afafine o Sialega o Nu’uuli i Tutuila, fa’aee le gafa: o Fonoti Nofoatolu Fata (tama ulumatua ‘O le Alii o Aiga’), ma Taelimu.
30. Toe usu #2 Nofoatolu Ti’auliva’a (ii) ia Timaima le afafine o Lolo Salulu o Salani i Falealili, fa’aee le gafa: o Nofoatolu Tamasipani (tama), ma Fualeva (teine).
31. Toe usu #3 Nofoatolu Ti’auliva’a (ii) ia Sina le afafine o Gaugau i Sapapali’i, fa’aee le gafa: o Nofoatolu Salatielu (tama), ma Nofoatolu Fata (tama).
32. Usu Fonoti Nofoatolu Fata ia Teoteo Taufagalupe le afafine o Seinafolava i Lotofaga Atua, fa’aee le gafa: o Fonoti Teoteo Tuipu’avai (tama).
33. Usu Fonoti Teoteo Tuipu’avai ia Saumaloto le alo o Tuala Tamalelagi o Safa’atoa i Lefaga, fa’aee le gafa: o Muiamana (teine ulumatua ‘Feagaiga ale Aiga’), Fonoti Tuala Sola (tama), Gauifaiva Samuela (tama), Poto (teine), ma Fipe (teine).
34. Usuia #1 Muiamana e Teleso o Si’umu, fa’aee le gafa: o Fonoti Pua’a (tama), Lasela (teine), ma Leota Tafilipepe Ioane (tama).
35. Toe usuia #2 Muiamana e Tafea Elise le alo o Lupe Tafea Tuai’ipuniu ma Fonoti LeTaupe Tuipalepale o Matatufu Lotofaga Atua, fa’aee le gafa: o Tafea Lomano Maioa (tama).
36. Usu Tafea Lomano Maioa ia Anne Vaelua Brown le afafine o Tuimanu’a Alexander Brown o Ti’avea Aleipata, fa’aee le gafa: Ola Mika Brown (tama), Fonoti Mata’utia Ioane Brown (tama), Tasala Brown (tama), Bella Brown (teine), ma Fiava’ai Brown (teine).
[: Ua toe fetaia’i i I’u o Gafa o Aiga e Lua ia Sa-Levalasi ma Sa-Tuala].
37. Usu Hon Fonoti Mata’utia Ioane Brown ole Aiga Pa’ia o Salevalasi i Lotofaga Atua ia Luisa ole Aiga Satuala ma le alo o L.M.S. Pastor Rev. Ieremia Manulesa FS Mata’utia Tuala o Sataua, Lealatele, Leauva’a ma Amoa i Savai’i ma Upolu, fa’aee le gafa e to’a sefulu ma le lua le fanau: o Uatogitau Alosio Fonoti Brown (tama), Fonoti Letaupe Ioane Jr Brown [tama: Fonoti Letaupe o Matatufu 1953], 38. Fonoti Inu Saufo’i Brown [tama: na soso’o ile Fonoti o Lotofaga Atua 1975], Hon Teoteo Asiasi’au Tiatia Sauso’o Fonoti Brown [tama: Faipule ole Malo 1973/1984], 39. Fonoti Tuala Le Sa’oalii Kamilo Brown [tama: Ole Sa’oalii o Satuala 1963, ma le Fonoti o Lotofaga Atua 2003], Falesefuluotualamasala Judith Fonoti Brown (teine), Lili’i Sae Benedict Fonoti Brown (tama), Lemalu Galusina Lalogafau Lui Paulo Asalemo Fonoti Brown (tama), Sailivao Peter Fonoti Brown (tama), Feiloa’ivao Paulo Fonoti Brown (tama), 40. Fonoti Tagaloamamana Inu Tulo Brown [tama: Fonoti o Lotofaga Atua 2016], ma Samala’ulu Otila Fonoti Brown (teine).

Tupu Tafa’ifa o Salamasina ma Fonoti o lo’o lagomau i le Aiga Pa’ia o Sa-Levalasi i Mulifusi ma Tanumaleu, po’o le Malae o Papa i Lotofaga, Atua.

AIGA E LUA O SAMOA: Na fa’avae mai ile Tuia’ana Tamaalelagi ma lona falesefulu. Ole Aiga Pa’ia o Sa-Levalasi ma le Aiga Fa’alagilagi Le Aiga Sa-Tuala. O Aiga fa’avae ma le faitaulia a ia e lua o lo’o ta’oto ai gafa Tautupu ma gafa Tautamali’i o Samoa. Na mavae ai fo’i le ulua’i Tupu Tafa’ifa o Salamasina ia Tumua ma Aiga mai i lona fa’atafa i Lotofaga, ua pa’ia o aiga e lua ole Aiga Paia o Sa-Levalasi male Aiga Sa-Tuala e tausi i Papa ma Aiga, ma latou toga ua pa’ia ole Pulu male Leuleu.

The Current Successor of the Fonoti of Lotofaga Atua Title: Ole tofa le Afioga o Fonoti Tagaloamamana Inu Tulo Brown o Lotofaga ma le Aiga Pa’ia o SaLevalasi i Lotofaga Atua.

Click on url links below to view articles on leading calls and previous made by the family:

Link: FonotiTualaLeSa’oaliiKamiloBrown

Link: HonFonotiSamoaFreedom1944-46

Link: TitleCourtSomeOfSalevalasiVsFonotiOfLotofagaIn1952

Link: SamoaKingdomFonotiBySamoanCustoms

Link: NafanuaLevalasiSalamasinaPapaE-Fa

A SPECIAL NOTE: A’e malamalama i lou gafa ma tagata na e tupuna mai ai, o le a fa’apena fo’i ona ofi atu ia te oe lagona o ia tagata. O TOA O SAMOA. Knowing your genealogy, po’o lou malamalama i le gafa a oe ma lou aiga, e atili fafaga ai le agaga ia te oe o le loto nu’u, ma lou loto aiga.

(“e ufiufi a le tama’imoa i le tanoa, ae ioio lava..”)


1 Response to “5. Le Aiga O Tupu, Aiga O Papa, Aiga Na Tafa’ifa, Aiga Taulagi O Samoa: Ma Le Gafa.”


  1. June 8, 2014 at 01:23

    Se’i faamatala le mafuaga o puleono I silafai faamolnole


Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s




BLOG CALENDAR

December 2016
M T W T F S S
« Apr    
 1234
567891011
12131415161718
19202122232425
262728293031  

BLOG STATS

  • 98,035 hits

BLOG ARCHIVE


%d bloggers like this: