01
Aug
08

OLe Aiga O Tupu, Aiga O Papa, Aiga Na Tafa’ifa, Aiga Taulagi O Samoa – Gafa

O Lau Aganu’u O Lou Tofi Mai Le Atua.

O LE AlGA O TUPU, AIGA O PAPA, AIGA NA TAFA’IFA, AIGA TAULAGI O SAMOA

O le usuga a Tuia’ana Tama’alelagi ia Vaetoeifaga le alo o Tui-toga Faisautele ona maua lea o le teine o Salamasina, le ulua’i Tupu Tafa’ifa o Samoa lea na e’e iai le Tuiatua, Tuia’ana, Gato’aitele, ma le Vaetamasoali’i i le finagalo a Levalasi So’oaemalelagi mai le susuga pa’u mai le fofoga a Nafanua i le Falefa o le Tapuaiga e fa’aee Papa e fa ia So’oaemalelagi. Ona usu mai lea o Tapumanaia le alo o le Tonumaipe’a Saumaipe’a ia Salamasina, ona maua lea o le teine o Fofoaivao’ese ma le tama o Tapumanaia(ii), lea na ave i Falealili e Elipo ma Tauanu’u e fai ma o la ali’i, ona fa’ae’e lea iai o lo la Ao o le Satele. O Satele Tapumanaia(ii), na soso’o ia Fofoaivao’ese ma lona tina o Salamasina i le Tupu. Ona usu ane lea o le ali’i o Tauatamainiula’aita ia Fofoaivao’ese ona fa’ae’e lea o le gafa:-O teine e to’alua o Taufau ma Sina ma lo la tuagane o Asomua Lemalama.

Ona soso’o foi lea o Taufau ma lona tina o Fofoaivao’ese i le Tupu. Ona usu lea iai o Tauili’ili Papa ia Taufau fa’ae’e le gafa:- O le ali’i o Tupuivao. O le tala i le ali’i lenei o Tupuivao e fiafia tele i le faiva o le seu lupe. Ua o’o ina vaivai le gasegase o lona tina le Tupu o Taufau, ona alu lea o le savali ia Tupuivao e sau ua vaivai le gasegase o lona tina le Tupu, ae le sau lava, ma lana upu e fa’apea “E le mafia ona ou alu atu se’i o’u talia lupe o maunu”. Ona to’atama’i ai lea o lona tina, o Taufau. Ua fai atu ia Tumua ma Aiga, “Ua agaleaga la’u tama ia te a’u, ae ia outou fa’alogo mai i la’u upu. 0 le a tafea la’u utu, ae o le a au le utu a lo’u uso o Sina.”

O le mafua’aga lena o le alagaupu “Ua tafea le Utu a Taufau.” O le uso lea o Taufau, le teine o Sina na usu iai Tito’iaivao o Faleatiu, ona fa’ae’e lea o le gafa:- O le ali’i o Faumuina, ma o le ali’i lenei e ana le TUPUFIA, O ia fo’i lea na soso’o ma Taufau i le Tupu, e pei ona mavaeina e Taufau ina ua le usita’ia e Tupuivao le fanoga o lona tina o Taufau. Ona usu lea o Tuia’ana Faumuina ia Manalelei le alo o Vaovasa fa’ae’e le gafa:O le ali’i o Fonoti, toe usu Faumuina ia Tu’uamaleulua’iali’i le alo o Manu’aifua o Afega fa’ae’e le gafa:- O le teine o Samala’ulu, toe usu Faumuina ia Atamulau le alo o Segi i Amoa fa’ae’e le gafa:- O le alii o Va’afusu’aga Tole’afoa.

0 le tina o Fonoti le tamaita’i o Manalelei na Malaga i Tanumaleu i LOTOFAGA i lona aiga ia Tupuola e totoma ai, i se Ie-toga e alu ai le Malaga a Tuia’ana Faumuina i Tutuila e a’ami lona uso o Tupuivao o aunu’ua ai. Ona alu lea o Manalelei ma ave le Mutia ma le Ma’a, o Papa o le Tuia’ana ua leai seisi lava mea o totoe i le Tuia’ana. A’o fai le alofisa o Tupuola, Seigafolava ma le tamaita’i o Manalelei, ona fa’amatala atu lea e Manalelei lona aveina atu o Papa o totoe i le Tuia’ana, ae o lo’o fa’afofoga iai Tupuola, ona fa’apea atu lea o Tupuola ia Manalelei, ua malie tele lau tala ma siou leo malu. O lou suafa lena e manatua ai le Alofisa i Tanumaleu nei “TalaleomalieOle mafua’aga lea o le suia o le igoa o le Tamaita’i ia Talaleomalie.

O le fai’a a Tupuola ma Manalelei, Na usu Tuiavi’i ia Letele-o-Talaia le alo o Mata’afa i Ululoloa Faleata fa’ae’e le gafa:- O Taua’aletoa, ma le teine o Unusialetoa. Usuia Unusialetoa e Malietoa Sa o Mulifanua fa’ae’e le gafa:- O Togia, Ifopo, ma le teine o Aloalonei. Usuia Aloalonei e Vaovasa o Gataivai Savai’i fa’ae’e le gafa:- O Manalelei. Taua’aletoa na usu ia Falenaoti Lelasiu’uila (Fufeai) le alo o Tauili’ili o Amaile Aleipata fa’ae’e le gafa:- O Tupuola, Tago, ma Pafuti le teine.

MAFUA’AGA O LE SUAFA “FONOTI”
Ua sauni le tamaitai o Talaleomalie Manalelei mo Leulumoega, ona fai loa fo’i lea o lo la ava taumavae ma Tupuola, ua uma lo la ava ua fono nei i le ti. Sa masani Samoa anamua ona fai umu ti, e eli le lua ona lau mai lea o le ti-vao ua lafo iai pei lava ose fa’avevela lona fa’atinoina. O le tasi fo’i lea aganu’u a Samoa anamua o lo’o o’o mai lava i nei ona po, a alu le usu e ave ai fo’i ma le fono o le ava pe’a uma. Ona fai lea o a la upu taumavae a Tupuola, ma Talaleomalie Manalelei. Ua fa’apea atu Tupuola i le tama’ita’i, Sauia o le a e fo’i i lou Ali’i ma I’e ia e lua. O le tasi I’e e Malaga ai Tuia’ana Faumuina e a’ami lona uso taufeagai. AE A ALO OE LE TAMA’ITA’I ONA FA’AIGOA LEA O LOU ALO IA FONO-TI, E FA’AMANATU AI LO TA AVA NA FONO NEI I LE TI. O le tasi o I’e, o le I’e o le nofo a lou alo i le Tuia’ana. Ua taunu’u Talaleomalie Manalelei i Leulumoega i lona ali’i, ua fola atu I’e o lana toma’aga ma fa’amatala a la upu taumavae ma Tupuola. Ua soisoi nei Tuia’ana Faumuina ma Le Tupufia ma lona leo maofa e fa’apea, A! o Pepeve’a I’e na. Ua Malaga Tuia’ana Faumuina i Tutuila ma le tasi, ae ua tu’u le isi I’e e pei ona mavae ai ma Tupuola.

Sa nonofo le fanau lenei a Tuia’ana Faumuina, ae peita’i! Na iloa e Fonoti ua foua e Va’afusu’aga Tole’afoa le nofoa’iga a lo latou tama. Ona tupu ai loa lea o le taua, o le taua lenei o le TAUA O LE TUPUFIA. Ua mae’a le taua ua fa’atoilaloina Va’afusu’aga Tole’afoa e Fonoti, ona avea loa lea o Fonoti ma Tupu o Samoa. Sa nofo pea Va’afusu’aga Tole’afoa ma mafaufau, e tatau lava ona laga lona to’ilalo. Sa ia taupulepule loa o le a si’i le taua ia Fonoti. Na o’o ilea aso na atofaina e si’i ai le taua, ae peita’i! E le’i fa’ataunu’uina. Toe o’o fo’i i le taimi ua tatau ai ona si’i le taua, ae te’i fo’i ua toe tu’u. E iai ona mafua O ia o le TAULAGI O AIGA, PO’O AIGA TAULAGI. E mafua mai le Taulagi i le taua e na ole taulagi ae le o’o. E mafua ai fo’i ma le Ie-toga a le Aiga Taulagi o le SI-I-MA-TU’U. Ona mavaeina lea e Faumuina le I’etoga o le Pepeve’a ia Fonoti, ae le malie ai Va’afusua’ga Tole’afoa I le mavaega a Faumuina, faimai e tatau ona ave le I’etoga i lo la tuafafine o Samala’ulu, peitai! E le mafia Fonoti.

O le mafua’aga fo’i lea o le taua sa faia a Fonoti ma Va’afusua’ga Tole’afoa ma lo la tuafafine o Samala’ulu. E tau’a fo’i o le taua o le Paegauo po o le taua o Papa e Fa! Ua “au fa’atasi Va’afusua’ga ma Samala’ulu ae to’atasi Fonoti. Ua tau le taua ona sulufa’i lea o Samala’ulu i le maota o le ali’i o Tofaeono, ae tuliloa atu e Fonoti. E ulufale atu Fonoti i le maota o Tofaeono o apo’apo mai le tao a Tofaeono, e fa’atalitali mai nisi e tuliloa atu ia Samala’ulu. E va’ai mai Tofaeono o Fonoti, ona fa’apea lea o Tofaeono. Fa’apea lava ita po’o ai, ae o oulua lava e tasi lo lua tama. 0 lea Fonoti o le a e “aufata i tao, ae aufata i toga oe Samala’ulu” UA TUPU TAFA’IFA NEI FONOTI, ae ua fa’atafea nei Va’afusu’aga Tole’afoa i Tutuila i le motu o Salai’a .

ONA USU lea O FONOTI TUPU ia FUATINO le alo o To’alepai o Satapuala fa’ae’e le gafa:- O le ali’i O MUAGUTUTI’A, toe usu FONOTI TUPU ia TA’ELE’ASA’ASA le alo o Tautaiolefue o Lealatele i Savai’i fa’ae’e le gafa:- O le teine O FALEGAOTI. O nei lava gafa e tau uma i le Tuia’ana, O iai le muagagana e fa’apea: “O Le Gafa O Tuia’ana Ua So’o.”

AlGA TAULAGI: UPOLU “Fasito’otai, ma Falese’ela.”
AlGA TAULAGI: SAVAI’I “Faga, ma Sa’asa’ai.”
AlGA SATUALA: UPOLU “Fasito’outa, Nafoali’i, Satapuala, Lefaga, Faleasi’u, ma Falese’ela.”
AlGA SATUALA: SAVAI’I “Amoa i Sisifo(Lano ma Pu’apu’a), Lealatele (Samala’ulu ma Mauga, e aofia ai ma Leauva’a i Upolu).

(“e ufiufi a le tama’imoa i le tanoa, ae ioio lava”)

GAFA AlGA O TUPU, AIGA O PAPA, AIGA NA TAFA’IFA, AIGA TAULAGI O SAMOA

TUI-FITI O LE TUPU O FITI:
1. Usu Tui-Fiti ia Si’uuilasisifo le alo o Tui-Atua Puluitua faae’e le gafa o Fata, po’o Fata-igoatele (tama: Suafa “Fata” o Lotofaga Atua Aiga Salevalasi).
2. Usu #2 Fata, po’o Fata-igoatele ia Sinasinavaiao le alo o Tuiatua Fogalepulu o Etemuli faae’e le gafa, o Fata (ii), po’o Fata-levave (tama).
3. Usu Fata (ii), po’o Fata-levave ile tama’ita’i o Fulu’ula-ale-matoto o le ilamutu o Tui-fiti i Lotofaga, fa’aee le gafa: o Leu (teine).
4. Usuia Leu e Matasepu o Lepa, fa’aee le gafa: o Tau’iliili, ma Talalaufala (teine). – (Ona tofia lea o Tauili’ili e lona tama, e alu i Amaile e tapega le a’ai e taunu’u iai le Ali’i o Aiga).
TUI-ATUA O LE TUPU O ATUA:
5. Usuia Talalaufala e le Tuiatua Fa’asoutele i Ti’avea, fa’aee le gafa: o Fililesalue (teine).
6. Usuia Fililesalue e Leali’ifanovalevale i Palauli, fa’aee le gafa: o Popoai (teine), Taufaito’a (teine).
TUI-TOGA O LE TUPU O TONGA:
7. Usuia Taufaito’a e le Tui-Toga (viii), faaee le gafa o Tui-Toga Puipuifatu (tama).
8. Usu Tui-Toga Puipuifatu ia Pulu-mata-moana le alo o Hulu-a-talala o Toga, faaee le gafa o Manaia (tama), ma Tui-Toga Faisautele (tama).
TUI-MANU’A O LE TUPU O MANU’A:
9. Usu Tui-Toga Faisautele ia Painu’ulasi le afafine o Tui-Manu’a Ali’atama le Tupu o Manu’a, fa’aee le gafa: o Vaetoefaga (teine), ma Ulualofaiga (tama).
TUI-A’ANA TAMALELAGI: FA’AVAE LE AIGA SA-TUALA; MA LE AIGA SA-LEVALASI ATUA:
10. Usuia Vaetoefaga le afafine o Tui-Toga Faisautele e le Tuia’ana Tamalelagi le atali’i o Tuia’ana Tagaloa Selaginato ia Vaetamasoali’i, fa’aee le gafa: o Tuioneoupolu (tama), ma Salamasina (teine: Ole Ulua’i Tupu Tafa’ifa o Samoa, ole Tuia’ana, Tuiatua, Vaetamasoalii, ma le Gatoaitele: le tamafai a So’oaemalelagi Levalasi e uso o la tina ma Tuia’ana Tamalelagi. Na mavae le ulua’i Tupu Tafa’ifa o Salamasina ia Tumua ma Aiga i lona fa’atafa gasegase i Lotofaga: O Aiga e Lua, ua Pa’ia ole Aiga Sa-Levalasi male Aiga Sa-Tuala e tausi i Papa ma Aiga, ma latou toga ua pa’ia ole Pulu ma le Leuleu).
SALAMASINA LE ULUA’I TUPU TAFA’IFA O SAMOA: LE AIGA PAIA O SA-LEVALASI ATUA:
11. Usuia Salamasina le ulua’i Tupu Tafa’ifa o Samoa e Tonumaipe’a Tapumanaia le atali’i o Tonumaipe’a Saumaipe’a o Auala i Savai’i, fa’aee le gafa: o Fofoaivaoese (teine), ma Tapulesatele (tama).
12. Usuia Tuia’ana Tuiatua Fofoaivaoese e Tauatamaniula’aita le alo o Valasi-I-Ologa ole Aiga Tonumaipe’a o Satupa’itea i Savai’i, fa’aee le gafa: o Taufau (teine: na tafea lana utu), Sina (teine: na au lana utu), ma Asomua Lemalama (tama).
13. Usuia Tuia’ana Tuiatua Sina e Tito’iaivao o Faleatiu i A’ana, fa’aee le gafa: o Faumuina ma Le Tupufia (tama: ulumatua ‘O le Alii o aiga’, e fa’alupe ole Tupufia; au’a e fia Tupu uma lana fanau).
14. Usu Tuia’ana Tuiatua Faumuina ma Le Tupufia ia Manalelei po’o Talaleomalie le afafine o Vaovasa o Gataivai i Savai’i, fa’aee le gafa: o Fonoti (tama: ulumatua ‘O Le Ali’i o Aiga’: Le Tupufia: O Le Tupu Tafa’ifa o Samoa, ole Tuia’ana, Tuiatua, Vaetamasoalii, ma le Gatoaitele. O le mavaega a Fonoti le Tupu Tafa’ifa ma lona uso; “O Papa, O Le A Ia Te A’u Ma La’u Fanau, A’o Le Ao ole Tonumaipe’a ia Tole’afoa Ma Lana Fanau”).
15. Toe usu Tuia’ana Tuiatua Faumuina ma Le Tupufia ia Tu’umaleulua’iali’i le afafine o Manu’aifua i Afega, fa’aee le gafa: o Samala’ulu (teine: Le Tupufia).
16. Toe usu Tuia’ana Tuiatua Faumuina ma Le Tupufia ia Atamulau le afafine o Segi i Amoa, Fa’asaleleaga i Savai’i, fa’aee le gafa: o Va’afusuaga Tole’afoa (tama: Le Tupufia, ma le fa’avae ole “Aiga Taulagi”).
FONOTI LE TUPU TAFA’IFA O SAMOA: LE AIGA PAIA O SA-LEVALASI I LOTOFAGA ATUA:
17. Usu Fonoti le Tupu Tafa’ifa ia Fuatino le afafine o To’alepaiali’i i Satapuala ole Aiga Satuala, fa’aee le gafa: o Muagututi’a (tama: ulumatua ‘O le Alii o aiga’ Tofiga: Na ioe Tumua ile malelega a le Tupu o Fonoti e fa’apea; Muagututi’a, O le a e alu ma lou Muagututi’a, lou Fuatino, lou Faumuina ma lou Melegalenu’u. E te nofo i Mulifusi. E te tua ia Sa-Tuala, ae tausi oe e Leulumoega).
18. Toe usu Fonoti le Tupu Tafa’ifa ia Taeleasa’asa le afafine o Tautaiolefoe o Lealatele ole Aiga Satuala i Savai’i, fa’aee le gafa: o Falegaoti (teine: Ma’opu o Tuala ma Sala).
19. Usu Muagututi’a ia Poto le afafine o Amituana’i Manaia o Si’ufaitoto’a i Faleata, fa’aee le gafa: o Seutatia (teine: ulumatua ‘Feagaiga a le aiga’ na tofia e ala’ala ile Maota i Mulinu’u Luiflufi).
20. Toe usu Muagututi’a ia Agaitafili le afafine o Lilo Seve o Salega i Savai’i, fa’aee le gafa: o Mata’utia (tama), Fualau (tama), ma Talopatina (teine).
21. Toe usu Muagututi’a ia Taumata le afafine o Toa’ali’i i Saluafata, fa’aee le gafa: o Fepulea’i (tama), ma Lagi (teine: tau le gafa ia Fa’asuamaleaui Mata’afa i Amaile).
22. Toe usu Muagututi’a ia Fenunuivao le afafine o Leutele i Falefa, fa’aee le gafa: e le fanau, Tupua Fuiava’iliili (tama fai: atalii o Fuimaono ma Oilau i Falealili: Tali a Satuala; Ia Ifo Tonu Le Fuiniu I Le Lapalapa: Na Saesae Laufa’i ai Tumua: Ma faae’e iai le ulua’i suafa Tupua, ma le ulua’i Tama-a-aiga: Au’a e tele aiga o le tama: Aiga Sa-Tupua).
FONOTI LE TUPU TAFA’IFA I MULINU’U LUFILUFI MALE AIGA PA’IA O SALEVALASI ATUA:
23. Usuia Seutatia o Mulinu’u i Lufilufi e Lilomaiava Nailevai’iliili o Palauli i Savai’i, fa’aee le gafa: o Nofoa-tolu Lilomaiava Vae-ole-nofoa-fia (tama: Suafa “Nofoatolu” muamua lea na fa’aee i Mulinu’u Lalogafu’afu’a ma Sepolata’emo i Lufilufi Atua).
24. Usu Nofoatolu Lilomaiava Vaeolenofoafia ia Sinaivaiana le afafine o Va’afusuaga o Faga i Savai’i, fa’aee le gafa: o Fonoti Nofoatolu Laufeti’iti’i (tama: O Le Aiga Sa-Fonoti i Lotofaga: ma Le Aiga Pa’ia o Sa-Levalasi i Lotofaga Atua).
FONOTI O LOTOFAGA: VA’ASA MA LE AIGA PA’IA O SA-LEVALASI I LOTOFAGA ATUA:
25. Usu Fonoti Nofoatolu Laufeti’iti’i mai Mulinu’u i Lufilufi ia Va’asa le afafine o Fiame Muagututi’a Le Sa’ofaapito ma le Aiga Pa’ia o Salevalasi i Lotofaga, fa’aee le gafa: o Fonoti Oliovaigafa (tama: ulumatua ‘O le Alii o aiga’), Nofoatolu Ti’auliva’a (i), ma Lagouta (teine) – (Fonoti Oliovaigafa na ai ali’i mai ia Molio’o ma le Ailaoa e fai ma o latou Ali’i e iai le ulua’i Suafa Fonoti sa ala’ala i lona maota o ‘Vainiu’ i Faleapuna. Na maliu ai lava le Ali’i ma sa lagomau ai lava. E pa, e leai sona suli).
26. Usu Nofoatolu Ti’auliva’a (i) ia Tamasailau le afafine o Lualemana o Asu i Tutuila, fa’aee le gafa: o Nofoatolu Ti’auliva’a (ii).
27. Usu Nofoatolu Ti’auliva’a (ii) ia Sologaliua le afafine o Sialega o Nu’uuli i Tutuila, fa’aee le gafa: o Fonoti Nofoatolu Fata (tama: ulumatua ‘O le Alii o Aiga’), ma Taelimu (teine)
28. Toe usu Nofoatolu Ti’auliva’a (ii) ia Timaima le afafine o Lolo Salulu o Salani i Falealili, fa’aee le gafa: o Nofoatolu Tamasipani (tama), ma Fualeva (teine).
29. Toe usu Nofoatolu Ti’auliva’a (ii) ia Sina le afafine o Gaugau i Sapapali’i, fa’aee le gafa: o Nofoatolu Salatielu (tama), ma Nofoatolu Fata (tama).
30. Usu Fonoti Nofoatolu Fata ia Teoteo Taufagalupe le afafine o Seinafolava i Lotofaga, fa’aee le gafa: o Fonoti Teoteo Tuipu’avai (tama).
31. Usu Fonoti Teoteo Tuipu’avai ia Saumaloto le afafine o Tuala Tamalelagi o Safa’atoa i Lefaga, fa’aee le gafa: o Muiamana (teine: ulumatua ‘Feagaiga a le aiga’), Fonoti Tuala Sola (tama), Gauifaiva Samuela (tama), Poto (teine), ma Fipe (teine).
32. Usuia Muiamana e Teleso o Si’umu, fa’aee le gafa: o Fonoti Pua’a (tama), Lasela (teine), ma Leota Tafilipepe Ioane (tama).
33. Toe usuia Muiamana e Tafea Elise le alo o Lupe Tafea Tuai’ipuniu ma Fonoti LeTaupe Tuipalepale o Matatufu Lotofaga, fa’aee le gafa: o Tafea Lomano Maioa (tama).
34. Usu Tafea Lomano Maioa ia Anne Vaelua Brown le afafine o Tuimanu’a Alexander Brown o Ti’avea Aleipata, fa’aee le gafa: Ola Mika Brown (tama), Fonoti Mata’utia Ioane Brown (tama), Tasala Brown (tama), Bella Brown (teine), ma Fiava’ai Brown (teine).
35. USU HON FONOTI MATA’UTIA IOANE BROWN ia LUISA le afafine o L.M.S. Pastor Rev. Ieremia Manulesa FS Mata’utia Tuala o Sataua, Lealatele, Leauva’a ma Amoa i Savai’i ma Upolu, fa’aee le gafa: o Uatogitau Alosio Fonoti Brown (tama), Fonoti Letaupe Ioane Jr Brown (tama: Fonoti Letaupe o Matatufu 1953), 36. FONOTI INU SAUFO’I BROWN (tama: Fonoti o Lotofaga Atua 1975), Hon Teoteo Asiasi’au Tiatia Sauso’o Fonoti Brown (tama: Faipule ole Malo 1973/1984), 37. FONOTI TUALA LE SA’OALII KAMILO BROWN (tama: Ole Sa’oalii o Satuala 1963, ma Fonoti o Lotofaga Atua 2003), Falesefulu-o-TualamaSala Judith Fonoti Brown (teine), Lili’i Sae Benedict Fonoti Brown (tama), Lemalu Galusina Lalogafau Lui Paulo Asalemo Fonoti Brown (tama), Sailivao Peter Fonoti Brown (tama), Feiloa’ivao Paulo Fonoti Brown (tama), 38. FONOTI TAGALOAMAMANA INU TULO BROWN (tama: Fonoti o Lotofaga Atua 2016), ma Samala’ulu Otila Fonoti Brown (teine).

——————-


0 Responses to “OLe Aiga O Tupu, Aiga O Papa, Aiga Na Tafa’ifa, Aiga Taulagi O Samoa – Gafa”



  1. Leave a Comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


BLOG CALENDAR

August 2008
M T W T F S S
« Jul   Sep »
 123
45678910
11121314151617
18192021222324
25262728293031

BLOG STATS

  • 98,035 hits

BLOG ARCHIVE


%d bloggers like this: